PULGADA (one inch) AY DI YARDA (36 inches)

PULGADA (one inch) AY DI YARDA (36 inches)

Pababa Dalawampu't Isa
ang tanong doon ay Pulgada
sa Ingles nga ay one inch siya
bakit naging sagot ay YARDA

para bagang di na nasuri
tila krosword ay minadali
pagkat pulgada't yarda'y hindi
magkasingkahulugan, mali

di ba nakita ng patnugot
ang nasabing mali sa krosword
ganyan nga'y di kalugod-lugod
tila wika'y napipilantod

ay, Buwan ng Wika pa ngayon
ganyang krosword ang nasalubong
parang textbook, may mali roon
na dapat ngang iwasto iyon

nawa'y di na mangyari ulit
tamang kahulugan ang hirit
nawa ito'y di ipagkait
sa'ming nagko-krosword malimit

- gregoriovbituinjr.
08.12.2025

* palaisipan mula sa pahayagang Pang-Masa, Agosto 11, 2025, pahina 7

Litisin si Lustay

LITISIN SI LUSTAY

ang sigaw ng marami: Impeach Lustay!

hustisya sa taumbayan ang hiyaw!

panawagan sa S.C.: Impeach Lustay!

ayaw namin kung bise'y nagnanakaw!

bakit ebidensya'y di ipakita

na nais mabatid ng taumbayan

kayrami nang salaping ibinulsa

mula sa buwis at kaban ng bayan

bigyan pa rin ng due process si Lustay

di tulad ng pinaslang o tinokhang

walang due process, kinitil ang buhay

karapatang pantao'y di ginalang

sana'y makinig ang Korte Suprema

at Senado: Impeach Lustay, Ngayon Na!

- gregoriovbituinjr.

08.11.2025

Si Oriang

SI ORIANG

dumalo ako sa Oriang

isang maikling talakayan

nang kaalaman madagdagan

ginanap iyon doon sa MET

layunin naman ay nakamit

sinapuso'y bagong nabatid

sa Supremo'y di lang asawa

kundi isang Katipunera

nakipaglaban, nakibaka

kahit ang Supremo'y pinaslang

ng dapat kasangga ng bayan

ay nagpatuloy si Oriang

taaskamaong pagpupugay

kay Oriang na anong husay

tanging masasabi'y Mabuhay!

- gregoriovbituinjr.

08.11.2025

* mga litrato kuha sa Metropolitan Theater, Maynila, Agosto 11, 2025, kasama ang grupong Oriang; ang aktibidad ay proyekto ng National Historical Commission of the Philippines (NHCP)

Low carb diet

LOW CARB DIET

sinimulan ang low carb, walang kanin

ito na ngayon ang aking layunin

mataas na sugar ay pababain

isda't lunting gulay ang kakainin

pangalagaan na ang kalusugan

nang malayo sa sakit o anuman

ang kaunting gastos ay kainaman

dapat nang palakasin ang katawan

sino pa bang tutulong sa sarili

upang sa malaon ay di magsisi

pangangatawan ay dapat bumuti

upang isip at loob ay kampante

salamat sa inyong mga pinayo

nang umayos ang asukal at dugo

salamat at ako'y inyong nahango

sa paglublob sa putik ng siphayo

- gregoriovbituinjr.

08.10.2025

Panamà at pamana

PANAMÀ AT PAMANA

anong panamà ng aking tulâ

sa pamana ng laksang gunitâ

alaala ng maraming sigwâ

sa isip ko'y madalas makathâ

may panamà ang bawat pamana

tula'y tulay nitong alaala

buti't ang diwa'y di nagbabara

di tulad ng kanal ng basura

sa kabila ng mga pasanin

ay patuloy pa rin ang lakbayin

kinabukasan ay iisipin

pangarap pa ring layon ay kamtin

sa dibdib ko'y laging naroroon

ang nawalang sinta't aking misyon

sa buhay, sa uri, at sa nasyon

kaya patuloy sa nilalayon

- gregoriovbituinjr.

08.10.2025

Sabalo

SABALO

Una Pahalang, agad nasagot

ang tanong: Nangingitlog na Bangus

batid ng buhay organisador

na kalsada iyon sa Malabon

bukambibig nga iyang Sabalo

ng isang lider na kilala ko

iyon ang kanyang iniikutan

upang masa'y pagpaliwanagan

ng mga isyu ng maralita:

pabahay, klima, basura, baha

batay sa isda ang mga ngalan

ng mga tabi-tabing lansangan

kaya Sabalo'y nasagot agad

sa palaisipang nabulatlat

sabalo'y bangus na nangingitlog

pag batid mo ang wikang Tagalog

- gregoriovbituinjr.

08.09.2025

* palaisipan mula sa Abante Tonite, Agosto 5, 2025, p.7

Plastik at baha

PLASTIK AT BAHA

kayraming plastik palang nagbabara
na pinagtatapunan ng basura
sa mga imburnal kaya may baha
sa iba't ibang daluyan ng tubig
sa lugar pang inihian ng daga

kayrami ring plastik ang nagsasabi:
"Bawal magtapon ng basura dito!"
ngunit kapitbahay siya'y bistado
na madalas magtapon ng basura
sa imburnal malapit sa kanila

kailan matitigil ang ganito
kung tao mismo'y walang disiplina
pag nagka-leptospirosis, kawawa
ang mga mapapalusong sa baha
ingat po, ingat, mga kababayan

dapat pang ipaalam pag nagbara
ang imburnal nang dahil sa basura
ay magbabaha, kawawa din sila
tao'y maging disiplinado sana
subalit ito'y pangarap na lang ba

- gregoriovbituinjr.
08.09.2025

* litrato mula sa editorial cartoon ng pahayagang Bulgar, Hulyo 31, 2025, p.3

Pagtahak

PAGTAHAK

lakad ng lakad

hakbang ng hakbang

tahak ng tahak

baybay ng baybay

kahit malayo

kahit mahapo

saanmang dako

ako dadapo

ang nilalandas

ko't nawawatas

bayang parehas

lipunang patas

pawang pangarap

kahit mailap

kahit maulap

nais maganap

- gregoriovbituinjr.

08.07.2025

Balitang welga

BALITANG WELGA

panig ba ng unyon ay naibulgar?

o ng manedsment lang sa dyaryong Bulgar?

nabayaran kaya ang pahayagan?

upang nagwelgang unyon ay siraan?

nang ako'y naging manggagawa dati

pabrikang KAWASAKI ay katabi

ng pabrikang noo'y pinasukan ko

doon sa Alabang, pabrikang PECCO

kaya ang laban ng kanilang unyon

sa kalooban ko'y malapit iyon

sa tarangkahan nga ng Kawasaki

papasok upang magtrabaho kami

nawa ang panig din ng nagwewelga

sa Bulgar ay maibalita sana

di lang ang panig ng nagnenegosyo

kundi't higit ang panig ng obrero

- gregoriovbituinjr.

08.06.2025

* ulat mula sa pahayagang Bulgar, Agosto 6, 2025,  pahina 2

* PECCO - Precision Engineered Components Corporation

Higit P17 Trilyong utang ng bansa

HIGIT P17 TRILYONG UTANG NG BANSA

labimpitong trilyong piso na pala

ang utang ng Pilipinas kong mahal

ito ang napabalita talaga

kaya ba mga bilihin na'y mahal?

isandaan labing-anim na milyong

Pinoy na itong ating populasyon

utang na hinati sa bawat tao

ay halos sandaan limampung libo

ano nang gagawin, kamanggagawa

ibebenta'y kaluluwa ng bansa

paano na ba ang kinabukasan

nitong bayan, ng lupang tinubuan

sana'y may makasagot nitong tanong

lalo't may Freedom from Debt Coalition

sa utang paano tayo lalaya?

may magandang bukas pa ba ang bansa?

kwenta:

P117,267,000,000,000 / 116,869,595 Pinoy

P147,745.87 bawat Pinoy

- gregoriovbituinjr.

08.02.2025

* populasyon ng Pilipinas, mula sa kawing na https://www.worldometers.info/world-population/philippines-population/ (as of 10:49 am)

* ulat mula sa pahayagang Sagad, Agosto 1, 2025, p.2