World Day of Social Justice ang a-bente ng Pebrero
marapat lang alalahanin ang araw na ito
tulad ng isa pang mahalagang araw sa mundo:
ang Daigdigang Araw ng Karapatang Pantao
lalo't marami nang inhustisya ang nagaganap
na ang mga biktima'y pawang mga mahihirap
tulad ng pagtakbo ng mga trapong mapagpanggap
at tulad sa pagpaslang sa dukha sa isang iglap
nahan ang hustisya, sa araw na ito'y itanong
bakit mga inosente'y nilagay sa kabaong
bakit sa pagpaslang, tuwang-tuwa ang mga buhong
mga ina'y nagsiluha, humihingi ng tulong
"ang hustisya ay para lang sa mayaman," kainis
isa man itong katotohanang walang kaparis
alalahanin natin ang World Day of Social Justice
hustisya'y dapat kamtin, di ito dapat Just-TIIS
- gregoriovbituinjr.
02.18.2022
Walang komento:
Mag-post ng isang Komento